تعاني!! آآه ياكم لي أعاني

أعاني والسبب قسوة زماني

زماني وش نصيبي منك قلي

من الفرحه وانا حزني طواني

طواني الهم واضحى لي رفاقه

رفيقن مابغيته لو بغاني

بغاني عقب ماذقت الجفاوة

حسيبي الله على من هو جفاني

جفاني واحدن ماكنت احسْبه

يقصر في وصالي لو ثواني

ثواني مع دقايقها توالن

مضت ايام وشهور ونساني

نساني ليه ينساني وانا اللي

عطيته قلبي وصافي حناني

حناني آه ويش اللي خذيته

سوى نكرانن اغتال الاماني

اماني حلم لكنه تحطم

على صخرة أنانية أناني

اناني مايعرْف مْن العطا الا

جروحن روحت روح التفاني

تفاني التضحيه هذا هو اللي

بدر مني ولكنه خفاني

خفاني واقعه لين انكشف لي

والا يالوهم من تعطي مكاني

مكاني يوم كنا كان لكن

لك الله يامحمد لا تعاني

محمد بن ضاوي

ونعم فيك وفي محمد بن ضاوي

شعر جميل وانتقاء رائع اخي ديفد
بارك الله فيك وفي عمرك

اهلين فهودي :
ياهلا فيك ومرحبا . شكرا عالمرور يا طيب .