للتسجيل اضغط هـنـا

قصر للبيع1960م² لاصحاب الذوق ا...  آخر رد: عقارى الرياض    <::>    فيلا للبيع 300م² بالصحافة 3 با...  آخر رد: فلل رائعة واحد    <::>    دورة مؤكدة إدارة العقود البترو...  آخر رد: شروق ياسين    <::>    فيلا للبيع 487م² روووعة بــحطي...  آخر رد: فلل روعه    <::>    ارض تجارية للبيع 750م² بالقيرو...  آخر رد: فلل كلاسيك    <::>    فيلا فاخره للبيع 500م² حطين – ...  آخر رد: فلل جميله 202    <::>    فيلا للبيع 350م² لاصحاب الذوق ...  آخر رد: عقارى الرياض    <::>    فيلا للبيع 260م² بربوة الياسمي...  آخر رد: فلل رائعة واحد    <::>    فيلا للبيع300م² لاصحاب الذوق ا...  آخر رد: عقارى الرياض    <::>    أرض سكنية للبيع 1050م² بالقيرو...  آخر رد: فلل كلاسيك    <::>   

 
العودة   منتدى خبراء البورصة > منتديات عامة > الركــــــن الأدبـــــي

قصايد الشاعر سلطان الهاجري

جمعت لكم قصايد الشاعر الكبير سلطان الهاجري وان شاء الله تنال اعجابكم يارب : صلوا علي النبي ...... ان جيت يا خاطر عسى الله

إضافة رد
 
LinkBack أدوات الموضوع انواع عرض الموضوع
قديم 30-11-2007, 02:08 PM   #1
" ابوخـالد "
راوي منتدى الخبراء
 
الصورة الرمزية superheater
 
قصايد الشاعر سلطان الهاجري











جمعت لكم قصايد الشاعر الكبير سلطان الهاجري

وان شاء الله تنال اعجابكم يارب : صلوا علي النبي ......




ان جيت يا خاطر عسى الله يحيِّيك على الشّحم ومبهّـرات الدّلالـي
عند الرفيق اللّي يعـزّك ويغليـك حيثك ولد عـودٍ عزيـزٍ وغالـي
وان رحت يا خاطر فلاعندنا فيـك تغيـب عنَّـا شهـور والاَّ ليالـي
خذها على الذِّرعان منِّي وانا اخيك الكذب ماهو من سمات الرِّجالـي
لاراجيٍ غيـرك ولانيـب راجيـك في كـل ميـرادٍ طـوالٍ حبالـي
افتل واحـل معقِّـدات الشّرابيـك واشيل ما شالت ظهور الجمالـي
ياما تصعلكنا وصرنـا صعاليـك وياما تحمّلنـا الحمـول الثّقالـي
للمرجله صرنـا عبيـدٍ مِماليـك وكفوفنـا تنـدا مـن اوّل وتالـي
لو كان مانملك رصيدٍ على شيـك اوجيهنا عنـد النشّامـا طوالـي
نشوم عن هذي ونِرهي على ذيك وما حاشت ايدينا مهو راس مالي




============================================




يابو العيون اللي هدبهـا مراييـش يابو الدلـع يااللـي شفايـاك ذبلـه
ياما على شانك نويـت المطاريـش وياما تبعتك شـرق والنـاس قبلـه
واليوم كني شفت في الوضع تشويش شيٍ مجمعت العلـوم تحسـب لـه
وش عاد لو تزعل علي الدراويـش أنا بدويٍ راح يتبع هـواء... أبلـه
علط الرقاب اللي وبرها عكاريـش لاربعت قلبـي يزيـن الطـرب لـه
ننزل بها في منـزلٍ مابعـد نيـش روضٍ خضر عشبه خزامـا وربلـه
في ليلةٍ يأتـي مطرهـا رشاريـش هـذا ربيـع القلـب عقبـه وقبلـه
لاتحسبني عقب فرقاك مـا أعيـش من لاحسب لي عادتي ماحسب لـه

حتيش لو بينتي الصد حتيش لانيب عنتر ولانتيب عبله




======================================




اللاش لامن صد جعله ابدعثـور لاناشد عنـه ولاهـوب غالـي
الغالي اللي صار له عدة شهـور مدري جنوب الدار والا شمالـي
اليا جفاني واعتذر قلت معـذور افرح اليا شفته وينسـاح بالـي
والله احبه حب مطلـق لمستـور واقدره قـدر الرفيـق الموالـي
من منكبي الأيمن الى مشة الزور قدره ومقداره مـن أول وتالـي
ابو حمد لاعسم الراي والشـور لاطاح حـظ امعثريـن العيالـي
يطري علي والهم طابور طابـور وينزاح عن عيني سواد الليالـي
مايلحقه في رفقتي شك وغـرور افخر ويفخر بي اليا جاء مجالـي
والا المهجن رفقتـه مالهـا دور رفيق حال وحـال يـا هملالـي
ياخذ معك مشوار ويلف ويـدور ويختار عن درب اليمين الشمالي
سملق ماعنده احساس وشعـور ماغير قال فلان وفـلان قالـي
لكن حمل الثور في غارب الثـور ما يستعيب العيب كود الرجالـي
لا تاكل الحرجه ولا تشهد الـزور وفعولها تستـر بنـات الحلالـي



==========================================




لايمي لاقلت احب بقيق واللّـي حولـه اقطع الله نصيب أبوه وجعل ماله والـي
جزء من دوله ، لكنّه في عيوني دولـه اعشقه واقـدّره قـدر الرّفيـق الغالـي
وكل ذكرى في ملفّات الغـلا محمولـه في ربوع بقيق جعل بقيق مالـه والـي
ياوجـودي لاذكـرت اللّيلـة المأهولـه يوم جيت أحث رجلي ، والسّعد يبرالـي
وانطحتني مثل ليل السّامـري وطبولـه جيدها برقه يلـوح ، وعودهـا ميّالـي
افتقدت الذّاكـره يـوم انتثـر مجدولـه ولا انتبهت ايلين طاحت غترتي وعقالي
وانتهى الشوط الإضافي ما كسبت الجوله الله انّه يغفـر ذنوبـي ويرحـم حالـي
ذقت شيء من رحيق الشفه المعسولـه ليتني ماذقت منها شيء كـان اشوالـي
استحيت من الأمور اللّي مهي معقولـه ا لأمـور اللّـي لا تتسـوَّى ولاتنقالـي
واصبحت قصّة غـرامٍ مالهـا حيلولـه مابقى الاّ اسم العنود ونمـرة الجوَّالـي



====================================




المرسدس حدنـا الحـادي وبعناهـا لو آنها اغلا من القلـب وشرايينـه
ماهوب عيـب ليـا منـا جلبناهـا رجلٍ جلب موتـره ووفـى ديايينـه
وان راده الله وزينـهـا وسـواهـا وتبدل الوقت من عسره ليـا لينـه
ماراح جعله مهف امقيـط ورشاهـا بيت القناعه من اقوى شـي بانينـه
وغلا العطايـا ليـا منـا عطيناهـا عيب علينا نقـول فـلان معطينـه
وليـا فعلنـا المراجـل ماذكرناهـا وابـو ملاييـن مانرجـي ملايينـه
اللي فعايـل يمينـه مثـل يسراهـا موس على شاربه وخلال في عينـه
وقولة ونعم الشوارب جعله افداهـا كلن يقلـط علـى ماتفعـل ايمينـه
سحابة الشعر هلـت وانتثـر ماهـا وستيقظ الفكر في وقته وفي حينـه
شاقه لحنها وجـازت لـه وغناهـا ونساق معنى القصيد وزان تلحينـه
واشهر الاسامي ليا منـا ذكرناهـا ماشال حمـل الزمـان الا بعاريـن
والقوم لـالله ومرها وساقت اخطاها تقول سمح النبا بحـر النـدا وينـه
وقول نايـف امعزبهـا ومنصاهـا ضلع ٍ على المرجله تقدح صواوينـه
لاقلت تكفا خـذا الغتـره ووطاهـا اما علـى يميـن ولا بينـك وبينـه
حر ٍ لامن اهوى على الصيده تعشاها مخالبـه للعشـا تسبـق جناحينـه




=====================================





بالله يا اهل دبـى والا هـل العيـن من قال تبشر بـه عطيتـه بشـاره
قرناس عشر سنين وأربع وعشرين والله فيـه مـن الوفـا والقشـاره
وإن قام يدرج عينه يسـار ويميـن مثل الخفير اللـى مداقـش خفـاره
يا شيب عينى لا كفـخ بالجناحيـن أسبق من إطيار الاباتشـى إطيـاره
ما هاجر إلا بين خضـر البساتيـن فى ضيافة اللى ما يحسب الخسـاره
يخلـى مراحيـن ويمـلا مراحيـن بيمناً من اصدوف الليالـى مجـاره
بيمنى الكريم مبدل العسـر بالليـن نعـم نعـم فـزاع نمـر النـمـاره
أشهر أبـراج العـام الأول وذلحيـن برجين برج إيفـل وبـرج التجـاره
وضيدان يكرم فى ضيافـة كريميـن كنّـه مـن المكتـوم والــدار داره
فندق جميرا بيتش وماريوت حمرعين من مر منهن قـام يمسـح جـداره
واليوم يا ضيدان وينـك وانـا ويـن خليتنـى مـا بيـن تـاره وتــاره
أشيل ما شالـت ظهـور البعاريـن وأصـد غـاره وآتـصـدى لـغـا


ره

=====================================




الرفيق اللي ليا غبـت مـا يحمـي قفـاي اجل لمن صرت حاضرمانـي فـي حاجتـه
احتمـي دوري ودور القبيلـه مــن وراي يجمـدوا هـرج الفراغـات يـا هراجتـه
كنهـا بمصامـخ الـروس ولا بـاي بـاي خلـو الفلـم المدبلـج علـى دبلاجـتـه
طول عمري ما اسمع من ضعيـف الـراي رايولا طمعـت بديـك خيبـر ولا دجاجتـه
العداوه شي عـادي تجينـي مـن عـداي من نسج نسج العداوات عرفـت نساجتـه
وان كلامي مخلب مـن مخالـب اصدقـاي قلت ضاعت صيدته فـي طـرف عجاجتـه
وان ثناهـا مـره ثانيـه جعلـه فــداي لافسـق كلـب الخواجـه كـلا خواجـتـه
الارض ماهي ورث ابي والسما ماهو سماي مير الاعوج لا عترض لي عدلت عواجتـه
افـرده واذوقـه لمستيـن مـن عصـاي وادبـه تأديـب طفـل عـلـى دراجـتـه
لين ينسى عناد راسـه ويذكـر مستـواي ينتبـه ولا يسوهـج علـى سوهاجـتـه
في نظـره النـاس مالـون واهـوه هـاي ها والمدوج ما بعـد فـاق مـن دواجتـه
ابك انا لو اشرب البحـر مايقطـع ظمـاي وانت مثل الضب يزحـف تحـت عجاجتـه



======================================




عليك الفرج يا الله يـا حـي يـا قيـوم إلـه عبـاده كلـهـا تلتـفـت يـمـه
ألا يارفيقـي والله إنـه عـداك الـلـوم أنا اللي على اللـوم فـي ذمتـي ذمـه
ولكن سامحني ترى العلـم فيـه علـوم ولايفـرح اللـي بيننـا ينقـل النـمـه
حصل ماحصل والعبد يصبر على المقسوم يدور الزمان ويخلـف العـزم والهمـه
طراةالرجل الالحقه من الزمـان همـوم لايدري بسدة كـود خيـرة بنـي عمـه
وسيع البنايـد فاشدايـد قـوي عـزوم لاعضك زمانك شال همـك مـع همـه
وأنا والله إنـي ماتهنـى بحلـو النـوم ورفيقي عليـه همـوم الايـام ملتمـه
أشيل الحمل منه واحطـه علـي واقـوم مقام يورد مضمي الماء علـى الجمـه
لكن الزمان الشين ظالم وانـا المظلـوم على الهون ياللي تمدح الوقـت وتذمـه
تهب الهبايب والسفـن فالبحـور تعـوم ويقفي بها صلف الهبايـب عـن اليمـه
هبوب تصلفقها وبحر وسمـاء ونجـوم ومـوج تقفـاه العواصيـف وتـزمـه




==================================





الليالي مشاكلهـا عـراض طوالـي للنفوس الشقيه والنفـوس السعيـده
غاره من يمين وغاره مـن شمالـي توهمك بالهدوء وعاصفتهـا شديـده
ياوجودي علي الراحه وياوجد حالـي ليت مالي مـع الشعـار ولانشيـده
هب ياهالزمان اللي غزانـي لحالـي كل يوم علي الهاتف يجينـي قصيـده
ذي معاتب حبيب وذي مشاريه غالي وذي تحفض من السكر وهاذي تزيده
والعرب علمهم بي يوم صدري شمالي والليالي مقفت بـه لايمكـن تعيـده
روحت مع مهـب الريـح ياهملالـي ماحد جت له الدنيـا علـي مايريـده
والتجارب عطتنـا ميـزه الاحتمالـي ودرستنا مشاويـر الحيـاه البعيـده
ان مابـه حيـاه الا وراهـا زوالـي والبنـادم بهالدنيـا شبوحـه بعيـده
مير ماهيب لامكسب ولاراس مالـي كود من حط قوله والنعم في رصيـده
وطاب عند البعيد وطاب عند الموالـي وله نصيب الاسد من الخصال الحميده
وان تثنت عزوم مشوربيـن العيالـي عزمه اقوي من ظروف الحياه العنيده
يرتكي بالمناكـب للحمـول الثقالـي والطفر في راسه المطنوخ والا وريده
خل فعل الجدود وخل فعـل الخوالـي ندري انك ولدهـم والعلاقـه وطيـده
وندري ان فعلهم يستر بنات الحلالـي حتي لو جدك اكحيلان وانتـه حفيـده
اما حث القدم واطلع علي راس عالي والا خلك كذا وان مت ما انت بفقيـده





=========================================

الموضوع الأصلي: قصايد الشاعر سلطان الهاجري || الكاتب: superheater || المصدر: منتدى خبراء البورصة

كلمات البحث

خبراء.أسهم.عقار.مال.كمبيوتر.مكتبة.ترفيه.برامج.فوركس.نفط.tasi.تداول.توصيات.ثمار.شمس.المعجل





rwhd] hgahuv sg'hk hgih[vd




superheater غير متصل   رد مع اقتباس
قديم 30-11-2007, 02:12 PM   #2
" ابوخـالد "
راوي منتدى الخبراء
 
الصورة الرمزية superheater
 




عشقت غيدا سمحتني عـن الغيـد أقـول والا بـس مانيـب قـايـل
ميت ضما والعد صعـب المواريـد وبذلت من شانه جميـع الوسايـل
والشربه اللي من حياض الأجاويد تقطع ضما هدف الضلوع النحايـل
يانووووف جيتك من ورا نازح البيد بالـراس مايحتـاج رد الرسايـل
وأن كان ماضمدتي الجرح تضميـد تحملي شرهـة عيـال الحمايـل
أنا دخيل الصـدر والثغـر والجيـد أرخي علي شلال شقـر الجدايـل
هذي تكفينـي مـن العيـد للعيـد وأنا علي يانـوووف رد الجمايـل
أحظنك بأشواقي من الإيـد للإيـد وشعرك على هاك المبيسم تمايـل
ياقوم يامبسـم نجـاح المساعيـد أنتي مثل تضـرب عليـه المثايـل
حبي وحبك حب عليا وأبـو زيـد والا مثـل حـب الطنايـا لحايـل




=======================================




انا يازماني في فوادي ثـلاث اطعـون ولاهي بطعنه من سيـوف اوسكاكينـي
من افتح ياسمسم والايافلم ابو كرتـون امورن تغث اكبـود حتـى الوراعينـي
وجمهوري الغالي يسوق الشره ويمون ونا قد شرهات العتـب مـن محبينـي
يقولون ماشاركت وقول انـت توحـون ابي كل واحـد يفتـح اذنـه ويوحينـي
لابالله ماشاركـت فـي شاعرالمليـون لواني على المليون تومـي شرايينـي
ولكـن انامانـي بخبـل ولامجـنـون اجـي وقطـع ارزاق العبادالمساكينـي
الاياحمام الـورق يااللـي تجرلحـون تغانم زمانك بيـن خضـر البساتينـي
تراهالا ركبة كل جمره علـى غليـون وراد الله انه يصفل الما عـن الطينـي
مثل ماوطى هامان والاوطى فرعـون ثياب الشـرف ماتستـر الاالشريفينـي
حشرنا الضبا بقرون ولا بدون اقـرون وراس الظبي يقرب من النـار ويلينـي
والاجواد مدت للمواهب اكفوف العـون وهذي صفات من صفـات الكريمينـي
والاقزام تهدم واهـل المعرفـه يبنـون صروح من الامجاد ماهي من الطينـي
بنتها الكفوف اللي كرمها سحاب مزون رموز العداله نصـرة الحـق والدينـي
غضبهم وانا سلطان يهتز منه الكـون وكرمهم تربع فيـه حتـى البعارينـي
اصالـه عربيـه وتاريخهـا مصيـون عناوينهـا تفـوق كــل العناويـنـي
جبال قممها فوق والها حجر وركـون قممهـا تشرفنـي ذراهـا يذريـنـي
عسى الله يهونها على الناس لين اتهون تزين القرايه فـوق روس المجانينـي
ضعاف العقول اللي تهبد على مالـون علـى كـل ملـواح تهـز الجناحينـي
ماتنضف يديهم لو تغسل من الصابـون كثر ماتمـد يدينهـا فـي المواعينـي
يدين عساها كـرم الله مـن يوحـون والا تدري هذي حطها بيـن قوسينـي
قبل لاتخيب ظنون والا تصيـب ظنـون وذي عين تبكيلي وذي عيـن تبكينـي
عزفنا وترى ماله علاقه بنجدي فـون نحـاول نعـدل مايـلات الموازيـنـي
رساله وباقي سرها في الثرى مدفـون سواة الامانه فـي وجيـه الميامينـي
ابداع القصيد ابداع والاحتـراف فنـون والابداع فـي كـل المجـالات يعنينـي
وشعر الحداثـه لامقفـى ولا مـوزون بـلا مذهـب بيـن ولا لـه قوانينـي
وعندي النهايه لعنة الله على شـارون عسى الله من اسرائيل ينصف فلسطيـن




=======================================




قالو شراله خمس ميـه وستيـن مسكين قلت اللي على البال كافـي
مدامني فنظـار الأقـزام مسكيـن هذا دليـل إنـي عزيـز و وافـي
نعم شريت البنزالأخضـر بتسعيـن سمته وتليتـه بتسعيـن صافـي
أبيـه لاقفـى مـن الليـل ثلثيـن وأقفت مدافيـح النجـوم المقافـي
أنخاه والدمعه تحت محجر العيـن نخوة دريكن ناخيـن لـه سنافـي
غيرت له زيتـه وعبيـت بنزيـن وأستنشق البنزين عقـب الوقافـي
كنه يصعط من صعـوط المجانيـن يرسي ليا جا فالطريـق أنعطافـي
وأقفا كما فرخن كفـخ بالجناحيـن نور الحسا قدمي وسلوى خلافـي
منصاه فـي نجدالعذيـه سلاطيـن أهل موقفن يوم الحرايـب يشافـي
الآاد روق مرجحيـن المـوازيـن شطرن ركب من قاف غيري وقافي
أقولها هالحيـن وأول وهالحيـن غصبن على أهل النفوس الضعافي




==============================================




أنا ولدهاجر وخصمي ولـد روق حصن تصاقع والضمايـر نظيفـه
لاحلق الجمهور طوق ورا طـوق مثل الضوامي فوق وادي حنيفـه
ولاأنت لاعاشق ولاأنته بمعشوق ولالك مع أصحاب الوظايف وظيفه
وأنا كتبت الشعرطاروق طـاروق وأحيان أوفق فيه وأحيان أعيفـه
ولاعاد له معنى ولاعاد لـه ذوق تقاسموه أهل النفـوس الضعيفـه
طاروق عانيه وطاروق مسـروق وأقرب قنـاة فاشلـه تستضيفـه


=========================================





الصراحه مزعجه وأنا صريح تزعلـك ماتزعلـك باقولهـا
شاعر موهوب ولساني فصيح وسابح عرض البحور وطولها
والافاعي سمها ينـذح نذيـح والعقارب سمها في ذيولهـا
ماعلى الدنيا ضمير مستريـح كل خلـق الله تهـن خيولهـا
ذا يحن وذا يـون وذا يصيـح وذا يخطف راسها ورجولهـا
والشعر هذاقبيـح وذا مليـح وكلبوها ساريـن مفعولهـا
أجلدالقبيح في وجـه القبيـح وقول وش رايك وقول أصولها
ولاتدري مايصح الاالصحيـح خاطب العالم على قد عقولها




==================================================




مرحوم ياحب ترعرع بالأعمـاق متغـذي دم العـروق الصخافـي
في كل عضو له مقـر وميثـاق بين الضلوع العوج بيـن وخافـي
يروق مع روقه مزاجي اليـا راق ويحس بي اليـا لحقنـي أخلافـي
ويحس بأشواقي اليا صرت مشتاق قدام يصبـح فالامـور اختلافـي
واليا هنا علقتهـا فـوق معـلاق وسليت سكيـن الخيانـه ياكافـي
ودعتك النسناس ياورد الأشـواق كرامتي تحكـم علـي بأنصرافـي
قطفت منك مـا تهيـا ومـا لاق ورميت باقـي ذكرياتـك خلافـي
لا دمعة طاحت ولا خاطر ضـاق ماقول غير اللي على البال كافـي
يكفي ثلاث سنسن مرت على ساق عين فراش لـك وعيـن لحافـي
واليوم في تسعه وتسعين طقـاق قلبي كذا طبعه اليا عـاف عافـي




==================================================




صح السانك وللقصـد مقصـود ماهوب ديكورن من الروح خالي
سحابتن في اطرافها برق ورعود ترعد جنوب وبرقها ف الشمالي
يهيم معها هاجس الشعر ويعود لأعظم ينابيع الوفـا والكمالـي
مولد قيم وامجاد وسهود ومهود ومهبط رسالة عظكته والجلالي
ونجد بصحاريها بساتين و ورود على المواطن والرفيق الموالـي
لبى خزامي نجد عنقود عنقـود ولبى صحاريها العراض الطوالي
احضانها دايم حجا كل مضهـود لا اشتدت العزمات يـا هملالـي
كل ذي نعمه بلا شـك محسـود الاعدقاء محور نقاش وجدالـي
يعني ليالي نجد ماتعتبـر سـود يوضي سماها نور حق وعدالي





=====================================




في عنفـوان البلبلـه والأقاويـل وزخم من الإعلام في زعيتمانـه
هذي قناه الشجب والحط والشيـل وهذي قنـاة الملعنـه والخيانـه
وهذي قناة الرقص ياعين ياليـل وعبـدالله ابالخيـر والبردقـانـه
والقدس تقصفها مدافع إسرائيـل والغرب يعزف عزف كيد ولعانـه
والشي والله في الليـال المقابيـل أصبر علي شوي وأقـول عانـه
عان الليال الحيل لقحن وهن حيل ولقاحهن غزو الأصـل والديانـه
غزو يسمى ديمقراطـي وتبديـل وطمس العوايد والشيم والأمانـه
وش قلت ياسداح في كذبة إبريـل هي في صميم الذات والا وزانـه
والهيل ياسداح عطـر الفناجيـل والجد ملـح العجرفـه والميانـه
والخيل وين سروجها ياهل الخيل راحت فرس عنتر تسابق حصانه
والمعركه بين النساء والرياجيـل مدري يفـوز فـلان والا فلانـه
وأن قام حظ أم الرموش المظاليل وقامت تثنـى كنهـا الخيزرانـه
ماعاد ياسـداح حيلـه ولا حيـل أطلق شنب قلـه يجـود مكانـه
والقبه اللـي للنشامـا مداهيـل ميدان سيف الله وعنتـر زمانـه
الله ثعا فيهم علـى مثـل ماقيـل بعنصـر نسائـي قـوي كيانـه
خطوات عوبا صوتها يصهل صهيل تشرشح النايب وتكـرب بطانـه





=========================================



superheater غير متصل   رد مع اقتباس
قديم 30-11-2007, 02:15 PM   #3
" ابوخـالد "
راوي منتدى الخبراء
 
الصورة الرمزية superheater
 




والله ما يفتح مغاليق الضمايـر كود تل الجيب والموقـع محـدد
لا كفخ بين الحتيفـه والزبايـر كفخ شيهان على الصيد يتهـدد
والحصى مثل الفشق بين التواير وعجها مثـل الغثيـر الياتبـدد
نحره معطي على الضيف البشاير عن مواجيب النشامى ما تصـدد
ذاك أبو سلطان حمال الخسايـر صامل الفزعات روقـي مـردد
يوم كلمته ، وجور الحمل جايـر قال أنا ابن روق قول ولا تـردد
قلت كفووو وهلت العين العباير لعن ابو قلب بحبـك مـا تجـدد
جعلها يمنا ما تلمسها الجبايـر اليمين اللـي تطـش ولا تعـدد
جعل يفدونـه مجمعـة التجايـر شلـة عنوانهـا قيـد وســدد
عكس أبو سلطان حمال الخساير صامل الفزعات روقـي مـردد


===========================================





يالحـون العـود والا يامجاريـر الربابـه إختلف معنى القصيد وضيـع الفنـان فنـه
حلم مدري علم مدري نوض برق في سحابه أثرها طلة جبينـه يـوم زاح الليـل منـه
أقبلت مثل الفرس لا سمعت طبول الحرابـه مقتفيهـا ليـل أسـود والنجـوم يفرقنـه
النهار يمـر ويعـدي وليلـه فـي عقابـه النحـر صبـح تجلـى والجدايـل كنهـنـه
مخمل يلتف فـوق الجيـد الأتلـع بالنيابـه عن سلاسيل الذهب والماس خوف يجرحنه
غاب عني والوله خلاه عندي فـي غيابـه مادرى ان فرقاه نار ولا درى ان لاماه جنه
ياوجودي وجد من صفق على ماضي شبابه بان شيبه والسنين اللـي يبيهـن خالفنـه
غرته خضر السنين وراح عمره مادرى بـه غررنـه وارفعنـه ليـن سـج وحولـنـه
وياوجودي وجد عـود لا عيـال ولا قرابـه ماجـداه إلا يـون ويـردف الونـه بونـه
مالقى فزعة رفيـق ولا دعـاة مستجابـه كل ماامسالـه بظـن خيبـت الايـام ظنـه
هذا وجدي في غياب اللي نـزح والله جابـه صح فرض الله فرض وسنة المرسول سنه
الغلا جسم رقيق ومرهف احساسـي ثيابـه مثل غصن الورد يـوم الهبايـب يطرقنـه
مازرعت إلا غـلاه ولا نقلـت إلا صوابـه والحشا ماضاق من خضر الطعون المستكنه
ياحبيبي مازها كف الخضـاب إلا خضابـه فيه نظم المفـردات وفيـه للعشـاق عنـه
الظبي ماله شبيـه وبينـك وبينـه تشابـه إلتفت بشويش وألقى فيه منك وفيـك منـه
خالقك من فضل محمد على كـل الصحابـه وسخرك مثل المهار اللي تسخرها الأعنـه
والثنا والشكر للي رحمتـه تسبـق عذابـه لا لخلـق الله شكـر ولا لخلـق الله منـه
قاله اللـي ماخـذا ممـا يريـد إلا هبابـه خيرة الفارس ثنية خيـل صفـرا مستعنـه


==============================




واهني الصخره اللي مايحرقها سمـوم الزمان اللي يهـد العـزم مـا هدهـا
الزمان اللـي تحـدا قوييـن العـزوم لين مشاهـا علـى ود ماهـو ودهـا
والمجامل بعض الأحيان ما يقضي لزوم لابو النفـس الضعيفـه ولابـو جدهـا
مير تجبرنا العوايـد وتجبرنـا السلـوم نكتم الأسـرار ياليـن تاصـل حدهـا
الردي لا طاح جعله يطيـح ولا يقـوم باح سده والنشامـا مـا بـاح سدهـا
كل ماكبرت وضاقت على عيال الرخوم نحتزم لأكبـر مصيبـه وناطـا خدهـا
جعل قسمي عند ربي من خيار القسـوم واحـد يعطـي العطايـا ولا يرتـدهـا
ياعيال آدم وحـوا تراهـا مـا تـدوم دورة الأيــام لابـدهــا لابـدهــا
ياوليد البـط وشلـون ماتقـدر تعـوم وانت ابوك يعوم جزر البحـور ومدهـا
وانت ياحلم حلمته مهو مثـل الحلـوم ياضحية مزح الأحـلام مـدري جدهـا
ادري ان فالناس معطى وفالناس محروم ايـه يابيـض النوايـا ويامسـودهـا
وياضميري لا يهمك من الدنيـا همـوم الصعيبـه حلهـا والبسيطـه عـدهـا
جات في سد الشوارب وفي سد الخشوم كبر الضيفه وعش الضيـوف وغدهـا
والمراجل ماتوفـى بضافيـة الهـدوم كود بسيوف يشـوق النواظـر حدهـا
والردي لو درس المرجله في كل يـوم المراجل عنـد اهلهـا يذعـذع ندهـا
يعتبر قسمه مثل قسم زاهيـة الرقـوم يوم تكحل رمشهـا والقـرون تكدهـا
ماكسبت الا رضا اهل النمايم والعلـوم يارسول الحكي هـات العلـوم وودهـا
الصفوف اثنين هذا دفـاع وذا هجـوم وانت اظنك لانت معها ولا انت بضدهـا
شرهة الطيب تعـداك للغـوج العـزوم وانت صلفات المشاريه ماانـت بقدهـا
وانت في سود الأظله تريـح ومخـدوم وان ذبحك الجوع كد التكاسـي كدهـا





=======================================




يا مجهز الفكسار بسيوف ورماح ومفرقات الجمع حيـن التحامـه
من ثقل مافوقه مطبـه تمرجـاح مجهزه راعيـه والـدرب أمامـه
يهوي كما حر دعي لـه بملـواح فوقه عطـاوي خوالـه عمامـه
من وادي الشبرم الى مفرق رماح يحدد السرعـه ويربـط حزامـه
وساعة تعدى سعد يالاح يومـاح عوذ من الشيطان وارخى خطامه
ولحظة وصوله والشفق مابعد باح رحبت به قـدام يبـدي سلامـه
على أشقر الفنجال والعود فـواح وفقـار شتـوي سنامـه يدامـه
واخذت منه روس الأقلام بألحـاح وازرا المفسر لا يفسـر حلامـه
ورحت أتصفح كل بيـت تصفـاح وافك حرف وحرف أزود لحامـه
يا ناصر الروقي ترى الزند قـداح والسلم الأول عـزه الله وادامـه
ماكل راعي ذود للـذود مصـلاح بعض الرعاه مرافقتـه الغشامـه
اللهم انه بس ضـاوي وسـراح عنده مساس الأرض كنه وخامـه
الموت لا طيح من الـذود طيـاح واقفى عليها الليل يابـو دلامـه
وجاتك بعد مده معاشيـر ولقـاح وولادهن عيد الضحيـه تمامـه
والغيث لاتكره مطيحه اليا طـاح ربع بصفـاره وعطنـي خزامـه
وان مرتك هجن المهابيل طفـاح اهبال طيب ولا صحـاوة رخامـه
هذا شطر بيت كما النجم وضـاح وعز الله ان راعيه على كلامـه
اللي مسح روس التماسيح تمساح واليا انتقم كـل يعـرف انتقامـه
والأولـه والثانيـه سـم اذحـاح يبحر بها الصايم وتجرح صيامـه
راحت سوالف كحيـح ونتحنـاح كل شكت سبابتـه مـن ابهامـه
واليا حصد زرع الفلاليـح فـلاح العز يبقى مـن يجـود زمامـه
ولا يربح المليون يا جورج قرداح يكود من راسـه قويـه عظامـه
ما يسترد الحق بصيـاح وانيـاح وبشت حساوي وسـاع كمامـه
الا بيوم فيه للجمـع ضحضـاح يشيب منه اللـي بحـزة فطامـه
واسلم ودم ماناض برقا ومـالاح واقبل تحية صاحبـك واحترامـه




==================================




الله ولابعـض السوالـف والعلـوم تحمـل الرجـال مــالا يـقـدره
مامن وراها الا المشاكل والهمـوم ياعنـك مافيهـا مـن الله خيـره
عسى غضب خطلان الايدي مايدو م وعسى عمـار الطيبيـن معمـره
ياسيدي سلطـان قومنـي وقـوم وارجو من الله ثم منـك المعـذره
وانا عن الزلات مانـي بمعصـوم والعفو ياكحيـلان عنـد المقـدره
انا حفيـد اللـي يسـدون اللـزوم يوم انها كانـت عبـوس وغبـره
والبيرق الخفاق من دون النجـوم وحدب السيوف مـورده ومصـدره
بقيادة اللي وحـد الدولـة عمـوم شق الطريـق وحـد الله ونصـره
عبدالعزيز اللـي لياشـن الهجـوم من صف عدوانه تضيـق المقبـره
الياصفق له خشم من بين الخشوم من قوة الصفقه يطيحـن عشـره
واصل على خوض المعارك بالعزوم وتقطعت عوص النجايب فـي ثـره
لين العلم رفرف على روس الرجوم في ظـل حـدب بالدمـى معطـره
وحنا ما غيرنا العوايـد والسلـوم اللي خلق فينـا الـولاء ماغيـره
معنا الولاء يزداد يـوم بعـد يـوم في صدورنا حتى ولـو مانشهـره
وحكي الرخوم اللي تروجه الرخوم والله ماغير فـي محبتنـا شعـره
ياسيدي وان راحت الاصحاب قـوم أحـد يسنـد علـم واحـد حـدره
انا دخيل حماك يـا الأب الرحـوم لاتستمع فينا ولـد رجـل ومـره
يامفرج الكربات فـلاج الخصـوم ملاذ من ضامه زمانـه وعسـره
انت الذي عن زلة الجاهـل تشـوم واليا كسرت العظـم ماحـد جبـره
محاسنك غيم ماهو مثـل الغيـوم اليا أصطفق برقه يسابقـه مطـره
غيث قدومه حي والله هـا القـدوم يروي الفياض الجـرد لله وومـره
وياسيدي ماحد من الطيب محـروم قولة نعـم عنـد الرجـال مـدوره
مير انت مثل طويق من بين الحزوم كل تـذرا فـي حيـوده وشجـره
تبي الحقيقه ياعسى عمرك يـدوم شعر مايكتب فيـك مافيـه ثمـره




=============================================




كلن كتب في حادثة يوم الأثنيـن لعلهـا غفـران ذنـب و مبـره
والشعر ما يوفي حقوق السلاطين فكرت فيها ألفين مـره و مـره
الشعر وين و منجزات الفهد وين محدن قدر يحصي نجوم المجـره
يا عل عين ما بكت يوم الاثنيـن و لا ذاقت إمن الحزن مثقال ذره
يالله عساها ما يجيها عمى العين تشوف لكن ما تشوف المسـره



===================================




البـارح امسيـت لا هـم ولا ضيقـة واصبحت والخاطر اضوق من ثقب لابره
واخذت فـي نجـد تغريبـه وتشريقـه واقول وين انت يا ضيدان اخـو حبـره
الصاحـب اللـي تونسنـي طواريقـه حبر القلم يستمد الحبـر مـن حبـره
الهـم يجتـاح قلبـي مـع معاليقـه لي ماضي التجربه يا ماضـي الخبـره
الحـر لا تــل فكيـنـا مسابيـقـه وان رد يـا مرحبـا مـن رد نعتبـره
ليـل رعــوده تقفتـهـا براريـقـه ولا رفيق الوفـى شبـري ورا شبـره



==========================================




مرحبا يأعذب الاصوات واغلاهـا صوتها العذب مرسالته على شانى
والمشاعر تلبى لى من اقصاهـا من خفوقى ومن دمى وشريانـى
كل بيتن يداعب حمـرة اشفاهـا يمتلكنـى ويامرنـى وينهـانـى
أنا وأرضى وشعرى من فداياهـا حتى بحرى ولولـوى ومرجانـى
وان كتبت القصيده مـن مزاياهـا اتحدى بيـوت الشعـر تعصانـى
ميـر حتـى قوافيهـا ومعناهـا كل بيتن يسابقنـى علـى الثانـى
والله اعلـم ولولاهـا ولـولاهـا مـا تحـدت ظـرف ولا تحدانـى
لين راحـت وراح القلـب وياهـا قلب سلطان مير الحب سلطانـى
حطتـه كنـه الخاتـم بيمنـاهـا مثـل خاتـم نبـى الله سليمانـى
وكل طعنه مـن الغاليـن حياهـا قد ذبحنى غلاااها العام واحيانـى
كنت من حبها اكتبها ولا اقراهـا مير ذالحيـن تكتبنـى وتقرانـى
في حياتى من اولها الـى اتلاهـا مهرتن كنها مـن خيـل جدانـى
كل مـا وصفوهـا كنـه اياهـا بس هذى بليـا سـرج وعنانـى
سرجها الليل لا انهـل وتغشاهـا تفهقه عن جبين الصبـح لابانـى
وان نطحهـا الهـوى ولا تقفهـ قمت اغنى لها لاحـي ياليحانـي
وأزرقتني برمحـن مـا تعداهـا وابتلتنـى يـاربـى لا تبـلانـى




==================================




الغلا والشوق يدفعنـي علـى الشرقيـه بين تيـار الغـرام وبيـن شـي ثانـي
امتثل لي ما يرد القلـب عـن طاريـه كل ما ذعذع نسيـم الـورد والريحانـي
مثل ما يضـرم خلـف هـذال للبريـه والله اني مضرم للشوق مـن وجدانـي
عاشق ما يلبس ثيـاب الغـلا عاريـه ما يعشق الا عقود اللـول والمرجانـي
الغصون الخضر حيه والمشاعـر حيـه غرب كورنيش الخبر شرقا عن الظهراني
اقلبـت واستغفـر الله كنهـا حـوريـه والشعر مثل الذهب يلعب على الأمتانـي
ان تثنـت كنهـا مـامـورة منهـيـه وان تمايـل عودهـا يـا الله لا تبلانـي
جيدها فتـان والفتنـه تجيـب السيـه والبروق تلوح بين الخـوخ والرمانـي
قلت وش هالغنج قالـت كـذا عفويـه بنت مملوحه جميله والجمـال اطغانـي
يضمحل الورد كـود الـورده المحميـه لا تطلقها الريح حرك عودهـا الريانـي
عن هجير الشمس احصل فيه ظل وفيـه آه يا لبيـه يـا زرعـي ويـا بستانـي




=================================





superheater غير متصل   رد مع اقتباس
قديم 30-11-2007, 02:22 PM   #4
" ابوخـالد "
راوي منتدى الخبراء
 
الصورة الرمزية superheater
 





سمعنـي اللـي تكيفنـي وتنعشـنـي وعرج على اكذب بيوت الشعر واعذبها
لاتنزعج من وضوح ومن فهد مشنـي ان راده الله وانـا سلطـان لأدبـهـا
تدري ورا اقلامهم قامـت تناوشنـي سمعت بلعبة قطوف وجـات تلعبهـا
لو انهـا يـا مبـارك مـا تحشمنـي لا مستوايـاتـهـا ولا مذاهـبـهـا
لكن ما اسمح لمن حـاول يهمشنـي سوا من اردا البشر والا مـن اطيبهـا
انياب شهب السباع ازرت لاتنهشنـي واليوم بعض الديـر هاشـت ثعالبهـا
لكنها في حضـوري مـا تهاوشنـي وان غبت قامـت عراقيبـي تشذبهـا
وانـا دخيلـك عليهـا لا تشيشـنـي لني ليا من بطشت بها بطشـت بهـا





===========================================





الاوله والثانيه قلنـا تطـوف واثر بنت ابليس ماهي تايبـه
وآخر الإنذار ياشلـة قطـوف فوق الإذن الحاضره والغايبـه
استرح ياتيس واربض ياخروف ريـس التحريـر ولا نايـبـه
مايجامل للضعوف الا الضعوف في الامور المخطيه والصايبـه
الله الله والنقط فوق الحـروف مانبي كشف العيـوب العايبـه
كل شين خابرينـه ومعـروف ولاتخيب الا الوجيـه الخايبـه
من لقا لحن مغنى ومعـزوف اورثه ورث الولد من شايبـه
وانت يالزبني عيونك ماتشوف لعنبوهـاك العيـون الرايبـه
انت وامثالك تحاف ولا تحوف وانا وامثالـي نجـر الهايبـه




================================




يــايــه الاخ الاسـتـاذ الحـمـيـدي السـلام ورحمـة الله والتحـيـه
وصلكم مني على رقـم البريـدي مايـلـي ومايلـيـق بمايلـيـه
واعتبرها اغلى قصيده من قصيدي من تعلمـت الحـروف الابجديـة
والولا والصدق والعلـم الوكيـدي والمشاعـر هاجريـه هاجريـه
والقبيلـه جحـدري ولاعبـيـدي كلنـا نايـف وزيـر الداخلـيـه
وكل شعب المملكه رايه وحيـدي صف واحـد والقيـاده فيصليـه
في الرخا يلقونـا عنهـم بعيـدي انتمشى في فضا الارض العذيـه
مير لاهز الهوى غصن الجريـدي اقرب مـن المملكـة للفيصليـه
صف واحـد لايهـس ولايحيـدي يدفعه معنى الكرامـه والحميـه
للمليك نقـول ياعمـي وسيـدي وللوطن نارد على حوض المنيـه
حينـا يفخـر وميتنـا شهيـدي ياصـلاة الله وياسـنـة نبـيـه
ومن طلع من صفنا مايستفيـدي ذمة المومن من الخايـن بريـه
والدواجـن لازكـاه ولارصيـدي ولاتسمى باسـم ثـروة حيوانيـه



==================================




لكزسن بيضاء تقل سكـر نبـات جت من اليابان في مينـاء دبـي
فل فل أوبشن و فـل مواصفـات غاية مـرادي و غايـة مطلبـي
ركبوا فيهـا لوايحهـا و جـات العدو يمـوت و الـلاش يهبـي
جابها شيكـن حروفـة ملفتـات يحمل أسم أطلق شنب حتىشنبي
سيدي فيصل و ذات الأسـم ذات راس مالـي سيـدي و معزبـي
ثالث النهرين دجلـة و الفـرات ‌‌‌‌‌‌ يارد الضامي عليـة و يشربـي
معجزة سبحـان رب المعجـزات يا صلاة الله على وجـة النبـي
يا ولد بحر الندى بنـك الغنـات للمواطن و الخـوي و الأجنبـي
ويا حفيد أعظم ملوك المملكـات في التاريخ الأنجلش و اليعربـي
و انت أبو كل المكارم والصفـات في المحيط المشرقي و المغربـي
ما يغلبك مـن أعيـال الأمهـات كود عمك با الكـرم مـا يغلبـي
سيدي سلطان لا راحت و جـات سمعتة فيها الغبي ما هو غبـي
مدتة تمـلا البطـون الجايعـات و فزعتة يسمن بها راس الضبي
أثقل من طويق و جبال السـرات تشتبه ما تشتبـه بـرق العبـي
أبو خالد تبتلـش فيـة الـروات وش يخلي الرواية و ش يكتبـي
أن رمن أشيالهن هـن مترفـات ون اتخن في كل شيـخ مجربـي
قال صار الموت أخير من الحيات مير هلي يـا المنايـا و أقربـي
أمتطي جرد السبايا المسرجـات و السيوف البيض يسباها سبـي
خيل العوجـا زبـون الوانيـات هذا الأسم اللي مسمينيـة أبـي
حاتمي وزيـر بـس الأفتخـات فيصلي و الزيـر سالـم تغلبـي
و انا معجب و القصايد معجبـات في ولد خالد عريـب المنسبـي
تاردة الأمداح من كـل الجهـات و تعشق أفعولة و طيبـة حيبـي
و اللحن و القافيـة و المفـردات صادق أحساسي و جهدي و اتعبي
و الختـام الباقيـات الصالحـات يا صلاة الله على وجـة النبـي


==================




ياليل ياساري على شاطيء النيـل ياكثر مابك من وناسـة وضيقـه
ماغير أوسع خاطـري بالمواويـل من خوف يشعل في الضماير حريقه
لابه بنـي عـم ولا بـه مراحيـل من دونهم بحـر يخـوف بريقـه
أثـر العـزب للنشامـا بهـاذيـل والبعد من بيـن الرفيـق ورفيقـه
تصبر على الغربة زحول الرجاجيل اللـي تمسـك بالحبـال الوثيقـه
والا الردي لو غاب من حرمته ليل الليـل الآخـر دونهـا مايطيـقـه




==================





تداحم في ضميري من تعابيـر القصيـد بحـور وأنا محتاج أعبرها ولا أجهـل فـي معابرهـا
لها معنى كبير يداعب إحساسي فـرح وسـرور مشاعـر ودي أترجـم معانيهـا وأصـورهـا
مادام إن الحياة شعور وأسباب القصيـد شعـور ومضمون القصيده صدقها من صدق شاعرهـا
هـلا حيـاك ياوجـه بزوغـه للمكـارم نـور ياكثر اللي تباشـر بـك ويـا مكبـر بشايرهـا
سموك يا سمي المصطفى بأجمل خبر منشـور جمعت النـاس بالأفـراح وإلتمـت مشاعرهـا
كفاك الله شـر الحاسديـن ونظـرة المغمـور ويحميك الولي مـن عالـم سـود ضمايرهـا
يسمونك محمـد يامحمـد وإسمـك المشهـور حظيـت بشـرة يامـا تعـب غيـرك يدورهـا
تجاذبك الحرار اللـي مواكرهـا بشـم القـور سجل المجد يحكي بالمفاخـر عـن مفاخرهـا
سلايل دولة أل سعود نعـم الذخـر والمذخـور ملـوك يقتبـس كـل إعربيـا مـن ذخايرهـا
مفاخـر فيصليـا لـه بتاريـخ الزعامـة دور شموخ الشجرة اللي طاب ماضيهـا وحاضرهـا
ولك من راس إبن مكتوم مجد آخر وطيب جذور شيـوخ يشهـد التاريـخ لأولهـا ولآخـرهـا
عريبين النسب رمز الشرف والقـدر والمقـدور لهم مـن سيـرة الأمجـاد وافيهـا وعاطرهـا
لهم بالجود جود وبالأدب مبـدى ورآس وشـور لسان"دبي"يحكـي فعـل حاميهـا وعامـرهـا
أدام الله فرحنا فيـك يابـن مزبـن المعسـور ليا منـه بلـش فـي حملـة ماهـو بقادرهـا
وفا عبدالعزيز ليا لحق بعض الطـوال قصـور إلـه يمنـا تطـول مـدة اليمنـى وتقصرهـا
تساما سيدي في عز مايسمـى بـه المغـرور وتواضع في شموخ شيمة أهل الكبـر كابرهـا
فتح بيبان بيته لاغـدت بعـض البيـوت قبـور وملك روس الرجال بطيب وإنقـادت خواطرهـا
واخذ من طبع أبوه سعود درس ومعرفه وحضور وقـال دروب أبـوي الكايـده مانـي مغيرهـا
جمع عز ومهابـه وإعتبـار يوجـع المقهـور يغيظ عداه والأصحـاب فـي ماحـل يخشرهـا
ليا منه نخاه اللي عليـه مـن الليالـي جـور وقف لـه وقفـة بالعيـن شايفهـا وخابرهـا
عسى له من محمد موجبات البـر والمشكـور عظيـم كـون الدنيـا ويعلـم فـي سرايرهـا



====================================





قال أنا عند ظنك قلـت لا بلـه أختلف فيك ظني نوبـه ونوبـه
قال واللي سواتك يدمح الزلـه قلت والغلطه اللي منك محسوبه
من بغاني على الشده رفيق له لا يقصر بماجوبـي وماجوبـه
الرفيق المهجن رفقتـه علـه لابس لي عباة الـود مقلوبـه
لو يجامل معي والكره مشتلـه المحردب تشوف الناس حردوبه
والشجاعه رجوله والردى ذله لا تحن الحصان إلا من ركوبه
يارفيق يحـد السيـف ويسلـه كل ما أقفى رفيقه حش عرقوبه
رفقة مالها مذهـب ولا ملـه يالله العفو والغفـران والتوبـه



====================================




قريت مـره كتابـة واحـد عنـي سوالف بيـض الله وجـه قايلهـا
شكرا على دقتك يا الكاتب الفنـي دشداشتـي والله إنـك مفصلـهـا
الله فعيـون جمهـوري مجملنـي وأسماء الرياجيل تعرف من فعايلها
هل تعلم إن الملابـس ماتمثلنـي وأنا أتقـدم وأمثـل قـوم بكملهـا
كانك ياعبدالله الراجس على ظنـي الاوله مـن بنـي أخينـا تحملهـا
والثانيه فرق الشيعي من السنـي حد المطيـه وروضهـا وعقلهـا
وإن جات ترفد بفزعة هن ابن هني إرتاح فالمجلس المفروش وأزهلها
حنا هل العلم وأهل السن والعنـي بسيوفنا كـل مـا ملـة نعدلهـا
ومهاترات الصحافـة ماتزعلنـي بعد إختلط عـج حابلهـا بنابلهـا
زيف وتماثيل لاراحـن ولا جنـي عطها صحافـة خليجيـة وتنقلهـا
لو تنعرض قصة سرحان والجنـي لحسين عبدالرضا يمكـن يمثلهـا





==============================



جيت متشوق من اللهفة وابـي ليـت والا عـل والا ربـمـا
يا صهاة الخيل يا عنق الظبـي لي متى والكبد يطويها الظمـا
قولي اني منتحـر والا غبـي المهم اطب فـي روض الحمـا
اقربي يا وردة الروض اقربـي وكل حاسد جعل عينـه للعمـا
ياصلاة الله على وجـه النبـي القمر في الارض والا في السما
الجمـال اليوسفـي اليعربـي انتمى لك فـي جمـال الانتمـا
جعل صناع البراقـع والعبـي ما يبل الريق من مـا زمزمـا



--------------------------------------------------------------------------------



superheater غير متصل   رد مع اقتباس
قديم 30-11-2007, 07:43 PM   #5
عضو نشيط
 



أنا ولدهاجر وخصمي ولـد روق حصن تصاقع والضمايـر نظيفـه
لاحلق الجمهور طوق ورا طـوق مثل الضوامي فوق وادي حنيفـه
ولاأنت لاعاشق ولاأنته بمعشوق ولالك مع أصحاب الوظايف وظيفه
وأنا كتبت الشعرطاروق طـاروق وأحيان أوفق فيه وأحيان أعيفـه
ولاعاد له معنى ولاعاد لـه ذوق تقاسموه أهل النفـوس الضعيفـه
طاروق عانيه وطاروق مسـروق وأقرب قنـاة فاشلـه تستضيفـه

كفو ياسلطان،،،

اشكرك على ذوقك الراقي سوبر



هامور اسهم غير متصل   رد مع اقتباس
قديم 30-11-2007, 08:28 PM   #6
كاتبه قديرة
 
الصورة الرمزية د/هوزر
 



من جد قصيدة رااائعه تسلم راوية المنتدى بس لو كانت صوتية راح تكون أفضل وأفضل نقره لعرض الصورة في صفحة مستقلة

دمت متميزاً راوية المنتدى نقره لعرض الصورة في صفحة مستقلة



د/هوزر غير متصل   رد مع اقتباس
إضافة رد

مواقع النشر (المفضلة)

الكلمات الدلالية (Tags)
الشاعر, الهاجري, سلطان, قصايد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 05:47 PM.


Powered by vBulletin® Version 3.8.7
.Copyright ©2000 - 2014, Jelsoft Enterprises Ltd
المنتدى يستخدم منتجات ArAvb

بناء على نظام السوق المالية بالمرسوم الملكي م/30 وتاريخ 2/6/1424هـ ولوائحه التنفيذية الصادرة من مجلس هيئة السوق المالية: تعلن الهيئة للعموم بانه لايجوز جمع الاموال بهدف استثمارها في اي من اعمال الاوراق المالية بما في ذلك ادارة محافظ الاستثمار او الترويج لاوراق مالية كالاسهم او الاستتشارات المالية او اصدار التوصيات المتعلقة بسوق المال أو بالاوراق المالية إلا بعد الحصول على ترخيص من هيئة السوق المالية.



Content Relevant URLs by vBSEO 3.6.0